Preeclampsia and Eclampsia (ကိုယ်ဝန်ဆိပ်တက်ခြင်း)

ကိုယ်ဝန်ဆိပ်တက်ခြင်းဆိုသည်မှာ ကိုယ်ဝန်ပတ် (၂၀) နောက်ပိုင်း သွေးပေါင်ချိန်တက်ခြင်းနှင့် ဆီး၌ အသားဓာတ်များနေခြင်း (proteinuria) ဖြစ်သည်။ စောစီးစွာ သိရှိကုသခြင်းမပြုပါက နောက်ဆက်တွဲပြဿနာများကြောင့် မိခင်နှင့်ကလေး အသက်ဆုံးရှုံးရနိုင်သည်အထိ ဖြစ်တတ်သည်။

ကိုယ်ဝန်ဆိပ်တက်ခြင်းကြောင့် ပုံမှန်ထက်စော၍ ကလေးမွေးခြင်း ဖြစ်ပေါ်နိုင်သည်။ ကလေးမွေးဖွားရမည့်အချိန်ကို ဆုံးဖြတ်ရာတွင် ကိုယ်ဝန်ဆိပ်တက်သူ၏ ခံစားရသောလက္ခဏာများ ဆိုးရွားမှုနှင့် ကိုယ်ဝန်ဆောင်ချိန်ကာလပေါ် မူတည်သည်။ မမွေးဖွားမီ ကိုယ်ဝန်ဆိပ်တက်နေသောမိခင်ကို ကုသရာတွင် ဆေးဝါးဖြင့် သွေးတိုးလျော့ကျစေရုံသာမက ဖြစ်ပေါ်လာသော နောက်ဆက်တွဲဆိုးကျိုးများကိုလည်း သေချာစွာ ဂရုတစိုက်စောင့်ကြပ် ကြည့်ရှုကုသပေးရမည်။ ကလေးမွေးဖွားပြီးနောက်မှ ကိုယ်ဝန်ဆိပ်တက်သော လက္ခဏာများခံစားရပါက မီးဖွားပြီးကိုယ်ဝန်ဆိပ်တက်ခြင်း (postpartum preeclampsia) ဟုခေါ်သည်။

ဖြစ်ပေါ်ရသောအကြောင်းရင်းများ

ကိုယ်ဝန်ဆိပ်တက်ရသော အကြောင်းရင်းများစွာရှိသည်။ ကျွမ်းကျင်သူများ၏အဆိုအရ ကိုယ်ဝန်တစ်လျှောက် မိခင်မှ ကလေးထံ အာဟာရပေးနေသောအချင်း၏ ချို့ယွင်းချက်ကြောင့် ကိုယ်ဝန်ဆိပ်တက်ခြင်း စတင်သည်ဟု ယူဆကြသည်။ ကိုယ်ဝန်အစောပိုင်းကာလတွင် ဖြစ်တည်လာသော အချင်း၌ အောက်ဆီဂျင်နှင့်အာဟာရ ပေးသော သွေးကြောသစ် ဖြစ်ပေါ်မှုများ မရှိခြင်းနှင့် အချင်း ပုံမှန်အလုပ်မလုပ်ခြင်းကြောင့် ကိုယ်ဝန်ဆိပ်တက်ရခြင်းဖြစ်သည်။

အခြားသော ကိုယ်ဝန်ဆောင်သွေးတိုးရောဂါများမှာ အောက်ပါတို့ဖြစ်သည်။

ကိုယ်ဝန်ဆောင် သွေးတိုးခြင်း – ကိုယ်ဝန်ဆောင်ကာလ (၂၀)ပတ် နောက်ပိုင်း ကျောက်ကပ်နှင့် အခြားကိုယ်တွင်းအင်္ဂါအစိတ်အပိုင်းများ ထိခိုက်ခြင်းမရှိဘဲ သွေးတိုးခြင်းကိုခေါ်သည်။ ကိုယ်ဝန်ဆောင်သွေးတိုးသူအချို့တွင် ကိုယ်ဝန်ဆိပ်တက်ခြင်းလက္ခဏာများ ဖြစ်ပေါ်လာတတ်သည်
ရေရှည်သွေးတိုးရောဂါဖြစ်ခြင်း – ကိုယ်ဝန်မဆောင်မီ သွေးတိုးရောဂါရှိနေသူများ သို့မဟုတ် ကိုယ်ဝန်ဆောင်ကာလ (၂၀)ပတ် မတိုင်မီကတည်းက မိမိ၏ ပုံမှန်ထက် သွေးပေါင်ချိန်တက်လာပြီး မွေးဖွားပြီး (၃)လ ကျော်သည့်တိုင်အောင် သွေးပေါင်ချိန်တက်နေသူများကို ရေရှည်သွေးတိုးရောဂါဖြစ်နေသည်ဟု သတ်မှတ်သည်
ရေရှည်သွေးတိုးရောဂါတွင် ကိုယ်ဝန်ဆိပ်တက်မှု ထပ်ဆင့်ဖြစ်ပေါ်ခြင်း – ကိုယ်ဝန်မဆောင်မီ သွေးတိုးရှိသူများ ကိုယ်ဝန်ရှိလာချိန်၌ သွေးပေါင်ချိန်ပိုမိုတက်လာပြီး ဆီးတွင်းအသားဓာတ်များ ပါဝင်လာခြင်း သို့မဟုတ် အခြားသော ကျန်းမာရေးပြဿနာများ ဖြစ်ပေါ်လာခြင်းကိုခေါ်သည်

အောက်ပါရောဂါအခြေအနေများတွင် ကိုယ်ဝန်ဆိပ်တက်ခြင်းကို ပိုမိုတွေ့ရှိရသည်။

ကိုယ်ဝန်မဆောင်မီကတည်းက သွေးတိုးရောဂါ၊ ဆီးချိုရောဂါ၊ ကျောက်ကပ်ရောဂါရှိခြင်း
သားဦးကိုယ်ဝန်မိခင်ဖြစ်ခြင်း
တစ်ဦးထက်ပိုသောကိုယ်ဝန် (အမြွှာကိုယ်ဝန်) ဆောင်ရခြင်း
ဖန်ပြွန်သန္ဓေကိုယ်ဝန် ဆောင်ထားရခြင်း၊
ကိုယ်ဝန်ဆောင်မိခင်အသက် (၃၅)နှစ် နှင့်အထက် ဖြစ်ခြင်း
မိခင်အဝလွန်ခြင်း
ကိုယ်ခံအားစနစ်မူမမှန်တုံ့ပြန်ခြင်းနှင့် ဆိုင်သောရောဂါများ (autoimmune disorders)
မိမိ၏မျိုးရိုးတွင် ကိုယ်ဝန်ဆိပ်တက်ရောဂါခံစားရသူများရှိခြင်း
ယခင်ကိုယ်ဝန်တွင် ကိုယ်ဝန်ဆိပ်တက်ခြင်း စသည့် အမျိုးသမီးများတွင် ပိုမိုတွေ့ကြုံနိုင်သည်။

ရောဂါလက္ခဏာများ

ကိုယ်ဝန်ဆိပ်တက်ခြင်း၏ အဓိက လက္ခဏာများမှာ_ သွေးတိုးခြင်း၊ ဆီးတွင်းအသားဓာတ်များပါဝင်ခြင်း၊ သို့မဟုတ် ကျောက်ကပ်နှင့် အခြားသော ကိုယ်တွင်းအင်္ဂါတစ်ခုခု ထိခိုက်ပျက်စီးသော လက္ခဏာများဖြစ်ပေါ်ခြင်း တို့ ဖြစ်ကြသည်။ ကိုယ်ဝန်ဆိပ်တက်ခြင်း၏ ပထမဆုံး လက္ခဏာတစ်ရပ်ရပ်ကို ပုံမှန်ကိုယ်ဝန်ဆောင် စောင့်ရှောက်မှုတွင် ကျန်းမာရေး စောင့်ရှောက်ပေးသူမှ စတင်တွေ့ရှိတတ်သည်။

သွေးပေါင်ချိန်တက်ခြင်းအပြင် အခြားသော ကိုယ်ဝန်ဆိပ်တက်လက္ခဏာများမှာ_

ဆီးတွင်း အသားဓာတ်ပါဝင်မှုများခြင်း (proteinuria) သို့မဟုတ် ကျောက်ကပ်ရောဂါလက္ခဏာများခံစားရခြင်း
သွေးတွင်း သွေးခဲစေသော သွေးဥမွှား (platelets)များ လျော့ကျနေခြင်း (thrombocytopenia)
အသည်းပြဿနာ ညွှန်းပြသော အသည်းအင်ဇိုင်းများတက်နေခြင်း
ခေါင်းထိုးကိုက်ခြင်း
မျက်စိဝေဝါးခြင်း၊ ခေတ္တမှုန်ဝါးသွားခြင်း၊ အလင်းကို ပုံမှန်ထက် စူးရှခံရခြင်း (light sensitivity)
ဝမ်းဗိုက်ပိုင်း ရင်ညွန့်အောင့်ခြင်း အထူးသဖြင့် ညာဘက်နံရိုးအောက်တွင် အောင့်ခြင်း
အဆုတ်ထဲအရည်ကြောင့် အသက်ရှူနှုန်းမြန်ခြင်း
ပျို့ခြင်း၊ အန်ခြင်း စသည်တို့ ဖြစ်ကြသည်။

ကိုယ်အလေးချိန်တက်လာခြင်းနှင့် ခြေချောင်း၊ လက်ချောင်းများ ဖောရောင်လာခြင်းသည် ကျန်းမာသော ကိုယ်ဝန်ဆောင်များတွင်လည်း ဖြစ်တတ်သည်။ သို့သော် ရုတ်တရက် ကိုယ်အလေးချိန်တိုးလာခြင်း သို့မဟုတ် ရုတ်တရက် မျက်နှာနှင့်လက်များ ဖောရောင်လာခြင်းသည် ကိုယ်ဝန်ဆိပ်တက်ခြင်း၏ ရောဂါလက္ခဏာဖြစ်နိုင်သည်။

နောက်ဆက်တွဲပြဿနာများ

ကိုယ်ဝန်ဆိပ်တက်ခြင်းကြောင့် မိခင်တွင်

အချင်းကွာခြင်း (placental abruption)
တက်ခြင်း (eclampsia)
HELLP syndrome (ဤရောဂါစုတွင် သွေးနီဥများ ပေါက်ကွဲပျက်စီးခြင်း (hemolysis)၊ အသည်းအင်ဇိုင်းများတက်ခြင်း (elevated liver enzyme)၊ သွေးခဲစေသော သွေးဥမွှားများ သွေးတွင်း၌လျော့ကျနေခြင်း (low platelets) တို့ပါဝင်သည်၊ HELLP syndrome သည် မိခင်ရော ကလေးပါ အသက်အန္တရာယ်ဖြစ်စေနိုင်သည့် ဆိုးဝါးသော နောက်ဆက်တွဲပြဿနာဖြစ်သည်)
သွေးပေါင်ချိန်တက်ခြင်းကြောင့် မိခင်တွင် လေဖြတ်၊ လေဖြန်းခြင်း၊ ဦးနှောက်အတွင်း သွေးကြောပေါက်ပြီး သွေးယိုစိမ့်မှုဖြစ်ပွားခြင်း၊ အသည်းနှင့်ကျောက်ကပ်များ ပျက်စီးခြင်းနှင့် ရေရှည်သွေးတိုးရောဂါ ခံစားရခြင်းများ စသည်တို့ ဖြစ်ပွါးနိုင်သည်။

ကိုယ်ဝန်ဆိပ်တက်ခြင်းကြောင့်ကလေးတွင်

အချင်းမှကလေးဆီသို့ သွေးနှင့်အောက်ဆီဂျင်၊ အာဟာရဓာတ်များ ရောက်ရှိမှုနည်းပါးခြင်းကြောင့် ကလေးကြီးထွားမှုနှုန်းနှေးခြင်း
ကလေး လမစေ့ဘဲ မွေးဖွားရခြင်း
ကလေးပေါင်ချိန် မပြည့်ခြင်း
ကလေးရုတ်တရက်သေဆုံးခြင်းများ ကြုံတွေ့ရတတ်သည်။

အထက်ပါ လမစေ့၊ ပေါင်မပြည့်ဘဲမွေးသောကလေးများ၏ နောက်ဆက်တွဲပြဿနာများ (ဥပမာ_မသန်စွမ်းခြင်း၊ ဖွံ့ဖြိုးမှုနောက်ကျခြင်း၊ အတက်ရောဂါ စသည်တို့) ဆက်လက်ဖြစ်ပေါ်လာနိုင်သည်။

ဆေးရုံ၊ ဆေးခန်းပြသရန်

သွေးတိုးရောဂါရှိသူများသည် ကိုယ်ဝန်စောင့်ရှောက်မှု စောစီးစွာခံယူခြင်းနှင့် နေ့စဉ် သွေးပေါင်ချိန်ပြီး သွေးပေါင်ချိန် (၁၄၀/၉၀) နှင့်အထက် ရှိပါက သို့မဟုတ် ကိုယ်ဝန်ဆိပ်တက်ခြင်းလက္ခဏာများမှ တစ်ခုခုခံစားရပါက နီးစပ်ရာ ကျန်းမာရေးဌာန၊ ဆေးရုံ၊ ဆေးခန်းများထံသို့ သွားရောက်၍ ဆွေးနွေးတိုင်ပင်ကုသမှု ခံယူရမည်။ လိုအပ်သော သွေးနှင့်ဆီး စစ်ဆေးခြင်း၊ စမ်းသပ်ကုသခြင်းများ ပြုလုပ်ပြီး ကိုယ်ဝန်ဆိပ်တက်ခြင်း၏ နောက်ဆက်တွဲပြဿနာများကို ကာကွယ်နိုင်ရန် လွန်စွာအရေးကြီးသည်။

ရောဂါရှာဖွေခြင်း

မိမိတွင် သွေးပေါင်ချိန်တက်ခြင်းအပြင် အထက်တွင်ဖော်ပြခဲ့သော ကိုယ်ဝန်ဆိပ်တက်ခြင်းလက္ခဏာ တစ်ခုခုခံစားရပါက သွေးပေါင်ချိန်တက်နေခြင်းကို သေချာစေရန် ရှာဖွေစစ်ဆေးရမည်။

သွေးပေါင်ချိန်တက်ခြင်း – ကိုယ်ဝန်ဆောင်စဉ် အပေါ်သွေးပေါင်ချိန် (နှလုံးမှသွေးလွှတ်စဉ် တိုင်းတာ၍ရသော သွေးပေါင်ချိန်) (၁၄၀) မီလီမီတာမာကျူရီနှင့်အထက်၊ အောက်သွေးပေါင်ချိန် (နှလုံးသို့သွေးပြန်စီးဝင်ချိန် တိုင်းတာ၍ရသော သွေးပေါင်ချိန်) (၉၀) မီလီမီတာမာကျူရီနှင့်အထက် ရှိခြင်းကို သွေးပေါင်တက်နေသည်ဟု ခေါ်ဆိုသည်။ ကိုယ်ဝန်စောင့်ရှောက်မှုလာပြစဉ် သွေးပေါင်တက်နေပါက အချိန် (၄) နာရီခြားပြီး ဒုတိယအကြိမ် ပြန်ချိန်သည့်တိုင် သွေးပေါင်တက်နေပါမှ သွေး‌ပေါင်တက်ခြင်း သေချာမည်။ ထိုသို့သွေးပေါင်တက်နေပါက ကိုယ်ဝန်ဆိပ်တက်ခြင်း ဟုတ်မဟုတ် သေချာစေရန် အောက်ပါ သွေး၊ ဆီး၊ အာထရာဆောင်းနှင့် ကလေးအတွက် ဇီဝရူပအချက်အလက်များကို ရှာဖွေဆန်းစစ်ရမည်။
သွေးစစ်ခြင်းများ – အသည်း၊ ကျောက်ကပ်ကောင်းမွန်မှု ရှိမရှိနှင့် သွေးခဲစေသောဓာတ်များကို တိုင်းတာရပါမည်
ဆီးစစ်ခြင်း – ကျောက်ကပ် ကောင်းမကောင်းကို (၂၄)နာရီ စုဆောင်းထားသော ဆီး (သို့မဟုတ်) ပုံမှန်ဆီး နမူနာစစ်ခြင်းပြုရမည်
အာထရာဆောင်းရိုက်ခြင်း – ကလေး၏ကြီးထွားနှုန်းကို ကျန်းမာရေးစောင့်ရှောက်သူမှ အာထရာဆောင်းဖြင့် အနီးကပ် စောင့်ကြည့်စစ်ဆေးနေပါမည်၊ ကလေး၏ ပုံရိပ်များမှတစ်ဆင့် ကလေး၏ကိုယ်အလေးချိန်၊ ရေမြွှာရည်ပမာဏတို့ကို သိရှိနိုင်သည်
ကလေး၏ဇီဝရူပ အချက်အလက်များလေ့လာခြင်း – သ‌န္ဓေသားကလေးငယ် လှုပ်ရှားနေချိန်တွင် ဖြစ်ပေါ်သော ကလေး၏နှလုံးတုံ့ပြန်မှုများကို စောင့်ကြည့်ခြင်း၊ အာထရာဆောင်းကို အသုံးပြု၍ ကလေး၏အသက်ရှူခြင်း၊ ကြွက်သား တောင့်တင်းမှု၊ ခန္ဓာကိုယ်လှုပ်ရှားမှုနှင့် ရေမြွှာရည်တို့ကို ကြည့်ရှုစစ်ဆေးခြင်း ဖြစ်သည်

ကုသခြင်း

ကိုယ်ဝန်ဆိပ်တက်ခြင်းကို ကုသရာတွင် ကလေးကို စောစီးစွာ မွေးဖွားလိုက်ခြင်း သို့မဟုတ် ကလေးကိုမွေးဖွားရန် အသင့်တော်ဆုံးအချိန်အထိ ရောဂါကို ကုသခြင်းတို့ဖြစ်သည်။ ထိုကုသမှုရွေးချယ်ခြင်းကို ကိုယ်ဝန်ဆိပ်တက်ခြင်း၏ ပြင်းထန်မှုအတိုင်းအတာ၊ ကိုယ်ဝန်ဆောင်ကာလနှင့် မိခင်နှင့်ကလေး၏ကျန်းမာမှု အခြေအနေများပေါ်တွင် မူတည်၍ ဆုံးဖြတ်ရမည်။

ကိုယ်ဝန်ဆိပ်တက်ခြင်း ပြင်းထန်မှုမရှိပါက မိခင်သည် ကိုယ်ဝန်ဆောင်စောင့်ရှောက်မှုလာတိုင်း ကျန်းမာရေးစောင့်ရှောက်သူက သွေးပေါင်တိုင်းခြင်း၊ ကိုယ်ဝန်ဆိပ်တက်သော ရောဂါလက္ခဏာများ ပြောင်းလဲမှု ရှိမရှိ စစ်ဆေးခြင်းနှင့် ကလေး၏ ကျန်းမာရေးစစ်ဆေးခြင်းတို့ကို ပြုလုပ်ပေးမည်။ လူနာကိုလည်း အိမ်တွင်နေ့စဉ် သွေးမှန်မှန်ချိန်ရန် ညွှန်ကြားထားလိမ့်မည်။

ပြင်းထန်ကိုယ်ဝန်ဆိပ်တက်ခြင်းရှိပါက ဆေးရုံတွင်တက်ရောက်ပြီး သွေးပေါင်ချိန်နှင့် ဖြစ်ပေါ်တတ်သော တက်ခြင်း (eclampsia)နှင့် နောက်ဆက်တွဲဆိုးကျိုးများကို အနီးကပ် စောင့်ကြပ်ကြည့်ရှုရမည်။ ကလေးကြီးထွားမှုနှုန်းနှင့် ကလေးကျန်းမာနေမှုကိုလည်း မကြာခဏ တိုင်းတာစစ်ဆေးရမည်။

ကုသသောဆေးဝါးများ

သွေးကျဆေးများ၊ တက်လျှင် အတက်ကျဆေးများ၊ ကလေး၏အဆုတ်အား ကောင်းစေရန် စတီးရွိုက်ထိုးဆေးများ လိုအပ်နိုင်သည်။

မီးဖွားခြင်း

ကိုယ်ဝန်ဆိပ်တက်ခြင်းသည် ပြင်းထန်မှုမရှိပါက (၃၇)ပတ် ကျော်မှ မွေးဖွားပေးပြီး၊ ပြင်းထန်ပါက (၃၇)ပတ် မတိုင်မီ ကလေးနှင့်မိခင်၏ ကျန်မာရေးအခြေအနေ၊ နောက်ဆက်တွဲပြဿနာများ ရှိမရှိပေါ် မူတည်၍ မွေးဖွားပေးသည်။ ကိုယ်ဝန်ဆိပ်တက်ခြင်း ပြင်းထန်မှု ရှိမရှိ၊ ကိုယ်ဝန်ဆောင်ကာလ၊ အခြားစောင့်ကြည့်ရမည့် အခြေအနေများကို ကျန်းမာရေးစောင့်ရှောက်သူမှ သေချာဆွေးနွေးပြီး ရိုးရိုးမွေးခြင်း သို့မဟုတ် ခွဲစိတ်မွေးဖွားခြင်းကို စဥ်းစားဆုံးဖြတ်ပေးမည်။

မီးဖွားပြီးနောက်ပိုင်းတွင် သွေးပေါင်ချိန်နှင့် အခြားသော ကိုယ်ဝန်ဆိပ်တက်လက္ခဏာများကို အနီးကပ်စောင့်ကြည့်ရသည်။ ဆေးရုံမှမဆင်းမီတွင် မီးဖွားပြီးနောက် ကိုယ်ဝန်ဆိပ်တက်ခြင်း၏ ရောဂါလက္ခဏာများဖြစ်သည့် ဆိုးရွားစွာ ခေါင်းကိုက်ခြင်း၊ မျက်စိဝေဝါးခြင်းနှင့် အခြားပြောင်းလဲမှုများ၊ ဆိုးရွားစွာ ဗိုက်အောင့်ခြင်း၊ ပျို့ခြင်းနှင့်အန်ခြင်းများ ရှိပါက ဆေးရုံသို့ပြန်လည်ပြသရန် မှာကြားမည်။

ကာကွယ်ခြင်း

ကာကွယ်ပေးနိုင်သောဆေးဝါးများ – ပမာဏနည်းသော အက်စပရင်ဆေးကို သောက်သုံးခြင်းဖြင့် ကိုယ်ဝန်ဆိပ်တက်ခြင်းကို ကာကွယ်နိုင်သည်ဟု ခိုင်မာသောတွေ့ရှိချက်ကြောင့် ကိုယ်ဝန်ဆိပ်တက်နိုင်သော အကြောင်းအရာ တစ်ခု (သို့မဟုတ်) တစ်ခုထက် ပိုရှိနေလျှင် ကိုယ်ဝန်ဆောင်ကျန်းမာရေးစောင့်ရှောက်သူမှ ကိုယ်ဝန်သက် (၁၂)ပတ် ကျော်သည့်အခါ အက်စပရင်ကို သောက်သုံးရန်အကြံပြုမည်၊ ဗီတာမင်အားဆေးသာမက မည်သည့်ဆေးမျိုးကိုမဆို မသောက်သုံးမီ သင့်တော်စိတ်ချရမှု ရှိမရှိ ကျန်းမာရေးစောင့်ရှောက်သူနှင့် ဆွေးနွေးတိုင်ပင်ရန် အရေးကြီးသည်
ကျန်းမာရေးနှင့်လူနေထိုင်မှုဘဝပုံစံ – ကိုယ်ဝန်ဆောင်မည့်သူများ၊ အထူးအားဖြင့် ယခင်ကိုယ်ဝန်တွင် ကိုယ်ဝန်ဆိပ်တက်ဖူးပါက ကိုယ်ဝန်မယူမီ မိမိကိုယ်ကို ကျန်းမာရေးနှင့်ညီညွတ်စွာ နေထိုင်စားသောက်ပြုမူခြင်းသည် အကောင်းဆုံးဖြစ်သည်
ကိုယ်ဝန်ဆိပ်တက်ခြင်းအန္တရာယ်ဖြစ်စေနိုင်သော အကြောင်းများရှိနေပါက မိမိ၏ဆရာဝန်နှင့် ဆွေးနွေးတိုင်ပင်ကုသမှု ခံယူထားသင့်သည်။

References:

Preeclampsia – Symptoms & causes – Mayo Clinic. (2022). Mayo Clinic. Retrieved July 22, 2024, from https://www.mayoclinic.org/diseases-conditions/preeclampsia/symptoms-causes/syc-20355745
Peri, C. (2023). Preeclampsia (Toxemia). WebMD. Retrieved July 22, 2024, from https://www.webmd.com/baby/preeclampsia
Pre-eclampsia | RCOG. (n.d.). RCOG. Retrieved July 22, 2024, from https://www.rcog.org.uk/for-the-public/browse-our-patient-information/pre-eclampsia/