Knee pain (ဒူးနာခြင်း)

ဒူးနာခြင်းသည် ရောဂါအမည်မဟုတ်ပဲ ရောဂါလက္ခဏာတစ်ခုသာဖြစ်သည်။ အသက်အရွယ် မရွေးဖြစ်နိုင်ပြီး ထိခိုက်ဒဏ်ရာရခြင်း၊ အဆစ်ကျီးပေါင်းတက်ခြင်း၊ ဂေါက်ရောဂါ၊ အဆစ်ရောင်ရောဂါ၊ အဆစ်ပိုးဝင်ခြင်း စသဖြင့် အကြောင်းအမျိုးမျိုးကြောင့် ဖြစ်နိုင်သည်။ ဒူးနာခြင်းတစ်ချို့သည် မိမိဘာသာအနားယူခြင်း၊ လေ့ကျင့်ခန်း ပြုလုပ်ခြင်းဖြင့် ကုသပျောက်ကင်းနိုင်သော်လည်း အချို့တွင် ခွဲစိတ်ကုသရသည်အထိ ဖြစ်နိုင်သည်။

ဖြစ်ပေါ်ရသောအကြောင်းရင်းများ

• ထိခိုက်ဒဏ်ရာ – ဒူးဆစ်အားတည်ဆောက်ထားသော အရိုး၊ အရိုးနု၊ အရွတ်ကြော၊ ကြွက်သား၊ အရည်အိတ် များဒဏ်ရာရနိုင်သည်။ ထိခိုက်ဒဏ်ရာရမှုကြောင့် အရိုးကျိုးခြင်း၊ အက်ခြင်း၊ ဒူးဆစ်လွဲခြင်း၊ အရွတ်ကြော စုတ်ပြဲခြင်း၊ အဆစ်တွင်းရှိ အရိုးနုကွင်းစုတ်ပြဲခြင်းတို့ အဖြစ်များကြသည်။
• အဆစ်ရောင်ရောဂါများ- အသက်အရွယ်ကြောင့်ဖြစ်သည့် ဒူးဆစ်ကျီးပေါင်းရောဂါသည် အဖြစ်အများဆုံးဖြစ်သည်။ အဆစ်တွင်းရှိ အရိုးနု တဖြည်းဖြည်းပါးလာပြီး အဆစ်ကျဉ်းကာ ပွတ်တိုက်နာကျင်ခြင်းဖြစ်သည်။ လေးဘက်နာအဆစ်ရောင်ရောဂါ၊ ဂေါက်ရောဂါ၊ အဆစ်ပိုးဝင်ခြင်း များတွင်လည်းဖြစ်နိုင်သည်။ ကလေးငယ်များတွင် ထိခိုက်ဒဏ်ရာနှင့် အဆစ်ပိုးဝင်ခြင်းများ ပိုမိုဖြစ်နိုင်သည်။
• အဆစ်တည်ဆောက်ပုံမူမမှန်ခြင်း – ဒူးဆစ်အတွင်း အရိုးနုအပိုင်းအစများ ပြုတ်ထွက်ခြင်း၊ ကြွက်သား အားနည်းခြင်း၊ အဆစ်ကိုထိမ်းသည့် အရွတ်များအားနည်းခြင်း၊ အဝလွန်ခြင်းကြောင့် ဒူးဆစ်ပေါ် ဒဏ်ပိခြင်း၊ အသုံးများခြင်း (အားကစားလုပ်ခြင်း၊ ခရီးဝေးလျှောက်ခြင်း၊ တောင်တက်ခြင်း)၊ ယခင် ဒဏ်ရာဟောင်းကြောင့် ဒူးဆစ်တည်ဆောက်ပုံပျက်ခြင်း၊ ဒူးဆစ်ခွဲစိတ်ခံရဖူးခြင်း တို့ကြောင့်လည်း ဒူးနာခြင်းဖြစ်နိုင်သည်။

ယှဉ်တွဲလာတတ်သောလက္ခဏာများ

ဒူးနာခြင်းနှင့်တွဲဖက်၍ အောက်ပါလက္ခဏာများကိုတွေ့ရှိနိုင်သည်။

• ဒူးဆစ်ရောင်ခြင်း
• ဒူး အကွေးအဆန့် ခက်ခဲခြင်း
• ဒူးဆစ်ဝန်းကျင်နီရဲခြင်း၊ ပူခြင်း
• ဒူးဆစ်တွင်း ပွတ်တိုက်သံခံစားရခြင်း
• လမ်းလျှောက်ရာတွင် အားပျော့ခြင်း၊ ခြေခွင်ကျခြင်း၊ လဲကျခြင်း
• ဖျားခြင်း

ဆေးရုံ၊ ဆေးခန်းပြသရန်

• ဒူးဆစ် ရောင်ခြင်း၊ နီရဲခြင်း၊ ဖျားခြင်း (အဆစ်ပိုးဝင်ခြင်းဖြစ်နိုင်သည်)
• ထိခိုက်ဒဏ်ရာရပြီး ပြင်းထန်စွာ နာကျင်ခြင်း၊ ပုံမှန်အဆစ်လှုပ်ရှားမှု မပြုလုပ်နိုင်ခြင်း စသည့် အခြေအနေများသည် အရေးပေါ်အခြေအနေဖြစ်နိုင်ပြီး အရေးပေါ်ဆေးကုသမှု သို့မဟုတ် ခွဲစိတ်ကုသမှုများလိုအပ်နိုင်သောကြောင့် ဆေးရုံအရေးပေါ်ဌာနများသို့ အချိန်မီပြသကုသမှုခံယူရန်လိုပါသည်။

မတ်တပ်မရပ်နိုင်ခြင်း၊ အကွေးအဆန့်ခက်ခဲခြင်း၊ နေ့စဉ်လုပ်ငန်းများထိခိုက်ခြင်းများဖြစ်လျှင် သင်၏ မိသားစုဆရာဝန်နှင့် ပြသတိုင်ပင်ရန်လိုပါသည်။

ရောဂါရှာဖွေခြင်း

မိသားစုဆရာဝန်မှ လိုအပ်သည့် စစ်ဆေးစမ်းသပ်မှုများပြုလုပ်ခြင်း၊ ဓာတ်ခွဲစစ်ဆေးခြင်း၊ ဓာတ်မှန်ရိုက်ခြင်းစသည်တို့ဖြင့် ရောဂါရှာ‌ဖွေကုသပေးနိုင်ပါသည်။ လိုအပ်ပါက မိသားစုဆရာဝန်မှ သက်ဆိုင်ရာအထူးကုဆရာဝန်များနှင့် တိုင်ပင်ကုသခြင်း၊​ လွှဲပြောင်းကုသခြင်းများ ပြုလုပ်ပေးနိုင်သည်။

ကုသခြင်း

ဒူးနာခြင်း သက်သာစေရန် အထိမ်းအကွပ်ပတ်တီး၊ ကိရိယာများသုံးစေခြင်း၊ လေ့ကျင့်ခန်းပြုလုပ်စေခြင်း၊ နာကျင်မှု သက်သာစေရန် အကိုက်အခဲပျောက်ဆေးများပေးခြင်း၊ နေထိုင်မှုပုံစံပြုပြင်စေခြင်းမှ ခွဲစိတ်ကုသခြင်းအထိ အကြောင်းရင်းပေါ်မူတည်ပြီး ကုသမှုပေးနိုင်သည်။ ဒူးနာနေချိန်တွင် လှေခါးအတက်အဆင်းလျှော့ခြင်း၊ ဒူးကွေး၍ ထိုင်ခြင်းကို ‌ရှောင်ခြင်း၊ ဘိုထိုင်အိမ်သာအသုံးပြုခြင်း၊ အလေးအပင် မ ခြင်းကို လျှော့ချခြင်း၊ လက်ကိုင်တုတ်အသုံးပြု၍လမ်းလျှောက်ခြင်း၊ ဆရာဝန်ညွှန်ကြားသည့် လေ့ကျင့်ခန်းများလုပ်ခြင်း စသည်တို့သည် နာကျင်မှုကိုသက်သာစေနိုင်သည်။

ကာကွယ်ခြင်း

ဒူးနာခြင်းသည် အကြောင်းအမျိုးမျိုးကြောင့် ဖြစ်တတ်သောကြောင့် ကြိုတင်ကာကွယ်ရန် တိကျသည့် နည်းလမ်းမရှိသော်လည်း ယေဘုယျအားဖြင့် ဖြစ်ပွားမှုနည်းအောင် လိုက်နာရမည့် အချက်များမှာ

• ကိုယ်အလေးချိန်လျှော့ချပါ။
• ကြွက်သားသန်မာအောင်လေ့ကျင့်ခန်းလုပ်ပါ။ ပေါင် ရှေ့နောက်ကြွက်သားများ၊ ခြေသလုံးကြွက်သားများ သန်မာလျှင် ဒူးဆစ်ပေါ်တွင် ဝန်ပိခြင်းသက်သာစေသည်။
• မိမိနှင့်သင့်တော်သည့် အားကစားနည်းကိုသာပြုလုပ်ပါ။
• နေ့စဥ် သွားလာမှုနှင့်လုပ်ငန်းခွင်တွင် ထိခိုက်မှုမရှိအောင်သတိပြုပါ။

First Published on: 30 August 2024