Posseting (နို့စို့အရွယ်ကလေးများ နို့ပြန်အန်ခြင်း)

နို့စို့အရွယ်ကလေးငယ်များ နို့တိုက်ပြီးခါစအချိန်တွင် ပါးစပ်နှင့် နှာခေါင်းမှ နို့ပြန်အန်ထွက်ခြင်းများ မကြာခဏ တွေ့ရတတ်သည်။ ထိုလက္ခဏာသည် အတွေ့ရများသော ပုံမှန်အခြေအနေတစ်ခုဖြစ်ပြီး နို့ပြန်အန်ခြင်း (သို့မဟုတ်) နို့ ပြန်လျှံတက်ခြင်း (posseting or reflux) ဟုခေါ်သည်။

အများအားဖြင့် ကလေးအသက် (၈)ပတ်ခန့်မှ စတင်ဖြစ်လေ့ရှိပြီး အသက် တစ်နှစ်ခန့်အရွယ်တွင် ပြန်လည်သက်သာသွားတတ်ကြသည်။ မိဘများအနေဖြင့် မိမိကလေး နို့စို့ပြီးတိုင်း အန်ခြင်းကြောင့် အစာအိမ်နှင့် အူလမ်းကြောင်း ပိတ်ဆို့မှုပြဿနာများ ရှိနေမည်ကိုလည်းကောင်း၊ မိမိကလေး အာဟာရအပြည့်အဝ မရရှိမည်ကိုလည်းကောင်း စိုးရိမ်တတ်ကြသော်လည်း အများအားဖြင့် စိတ်ပူရန်မလိုပါ။

ဖြစ်ပေါ်ရသောအကြောင်းရင်းများ

အဓိက အကြောင်းရင်းမှာ နို့စို့ကလေးများ၏ အစာရည်မျိုပြွန်နှင့် အစာအိမ်အဝရှိ ကြွက်သားများ ကောင်းစွာမဖွံ့ဖြိုးသေးသောကြောင့်ဟု ယူဆကြသည်။ နို့စို့ပြီးခါစတွင် လေတက်အောင် ကလေးကို မတ်မတ်ထောင်ထားခြင်းမရှိဘဲ ချက်ချင်းလှဲသိပ်လိုက်ခြင်းကြောင့် ဖြစ်လေ့ရှိသည်။ ထို့ပြင် နို့စို့စဥ်အချိန်၌ လေမျိုချမှုများသည့်အတွက် လေပြန်တက်ချိန်တွင် နို့များပါအတူ ပြန်တက်လာပြီး နို့ပြန်အန်နိုင်သည်။

ယှဥ်တွဲလာတတ်သောလက္ခဏာများ

ကလေးများသည် ရက်ခြား၍ဖြစ်စေ၊ ဆက်တိုက်ဖြစ်စေ နို့ပြန်အန်နိုင်သည်။ နို့အန်တတ်သည်မှလွဲ၍ နို့ကောင်းကောင်း စို့နိုင်ခြင်း၊ လန်းလန်းဆန်းဆန်း ရှိခြင်း၊ ဆီး ဝမ်း ပုံမှန်သွားနိုင်ခြင်းများ၊ ကိုယ်အလေးချိန် ပုံမှန် တိုးတက်နေခြင်းများရှိပါက စိုးရိမ်ရန် မလိုပါ။ သို့သော် သာမန် နို့ပြန်အန်ခြင်းမျိုး မဟုတ်ဘဲ အခြားရောဂါအကြောင်းရင်းများ တွဲ၍ရှိနေပါက အောက်ပါအန္တရာယ်လက္ခဏာများကိုပါ တွေ့ရတတ်သည်။ ယင်းလက္ခဏာများမှာ

နို့အန်သည့်အထဲတွင် အစိမ်းရောင် (သို့မဟုတ်) ကော်ဖီရောင် (သို့မဟုတ်) သွေးစပါခြင်း
အဖျား တက်လာခြင်း
အန်လျှင် အရှိန်ပြင်းပြင်းနှင့် ပမာဏများများ အန်ခြင်း
နို့စို့ပြီးပြီးချင်း မအန်ဘဲ (၁)နာရီ သို့မဟုတ် (၂)နာရီကြာမှ အန်ခြင်း
ဗိုက်ဖောင်းခြင်း၊ ဗိုက်ကို အထိမခံနိုင်ဖြစ်ခြင်း
ဝမ်းလျှောခြင်းနှင့် ရေဓာတ်ခန်းခြောက်ခြင်း လက္ခဏာများရှိခြင်း
နို့စို့ရန် (သို့မဟုတ်) အစားစားရန် ငြင်းဆန်ခြင်း
အခြားလက္ခဏာများရှိခြင်း (ဥပမာ-ဝမ်းချုပ်ခြင်း၊ ဝမ်းပျက်ခြင်း၊ ဆီးသွားလျှင် နာကျင်သည့်ပုံ ထင်ရ၍ အလွန်အမင်း အော်ငိုခြင်း)
ကိုယ်အလေးချိန် ကျလာခြင်း တို့ဖြစ်သည်။

နောက်ဆက်တွဲပြဿနာများ

အဓိက နောက်ဆက်တွဲ ပြဿနာမှာ ကလေးများ မကြာခဏပြန်အန်ရာမှ အစာရေမျိုပြွန်နံရံရှိ အမြှေးပါးများနှင့် အစာချေရည်မှ အက်ဆစ်ဓာတ်များ ထိတွေ့မှုကြောင့် စားချဥ်ရည်ပြန်သောရောဂါ (GERD) ဖြစ်လာနိုင်ခြင်းဖြစ်သည်။ ထိုအခြေအနေတွင် က‌လေးငယ်များ၌

နို့တိုက်နေစဉ် သို့မဟုတ် နို့တိုက်ပြီးပြီးချင်း မအီမသာ ဖြစ်ခြင်း၊ စိတ်တိုခြင်း
နို့စို့ပြီးတိုင်း ငိုခြင်း၊ အိပ်စက်ရန် ခက်ခဲခြင်း
နို့စို့ပြီးသောအခါ ချောင်းဆိုးခြင်း (သို့မဟုတ်) ကြို့ထိုးခြင်း (သို့မဟုတ်) သီးခြင်း
ကိုယ်အလေးချိန် ကျလာခြင်း (သို့မဟုတ်) တက်ရန်နှေးခြင်း
နို့ကို မျိုချရာတွင် ခက်ခဲခြင်း
အသက်ရှူကျပ်ခြင်း၊ တရွှီရွှီ မြည်ခြင်း စသည့် လက္ခဏာများကို တွေ့ရနိုင်သည်။

ဆေးရုံ၊ ဆေးခန်းပြသရန်

အထက်ပါ ရောဂါလက္ခဏာများကို သတိပြုမိပါက မိမိ၏ မိသားစုဆရာဝန်နှင့် ပြသတိုင်ပင်ရန် လိုအပ်သည်။ မိသားစုဆရာဝန်မှ လိုအပ်သည့် စစ်ဆေးစမ်းသပ်မှုများ ပြုလုပ်ခြင်း၊ ဓာတ်ခွဲစစ်ဆေးခြင်း၊ ဓာတ်မှန်ရိုက်ခြင်း စသည်တို့ဖြင့် ရောဂါရှာ‌ဖွေ ကုသပေးနိုင်သည်။ လိုအပ်ပါက မိသားစုဆရာဝန်မှ သက်ဆိုင်ရာ အထူးကုဆရာဝန်များနှင့် တိုင်ပင်ကုသခြင်း၊ လွှဲပြောင်း ကုသခြင်းများ ပြုလုပ်ပေးလိမ့်မည်။ ထိုသို့မဟုတ်ဘဲ နို့အန်တတ်သည်မှလွဲ၍ ကောင်းမွန်စွာ နို့စို့နိုင်ခြင်း၊ လန်းလန်းဆန်းဆန်း ရှိခြင်း၊ ဆီး ဝမ်း ပုံမှန် သွားနိုင်ခြင်းများ၊ ကိုယ်အလေးချိန် တက်နေခြင်းများရှိပါက စိုးရိမ်ရန် မလိုပါ။

ရောဂါရှာဖွေခြင်း

နို့ပြန်အန်ခြင်းအတွက် ကလေးများကို သွေးစစ်၍ ဓာတ်ခွဲစစ်ဆေးခြင်းများ၊ ဓါတ်မှန်ရိုက်ခြင်းများ ပြုလုပ်ရန် အမြဲမလိုအပ်ပါ။ သို့ရာတွင် အန္တရာယ်ရှိသော လက္ခဏာများရှိလျှင် သို့မဟုတ် နောက်ဆက်တွဲပြဿနာ ရှိနေကြောင်း သံသယရှိလျှင် သွေးစစ်ဆေးခြင်း၊ အစာရေမျိုပြွန်နှင့် အစာအိမ်သီးသန့် ဆေးဓါတ်မှန်ရိုက်ခြင်း စသည်တို့ကို ပြုလုပ်၍ ရောဂါရှာဖွေနိုင်သည်။

ကုသခြင်း

သာမာန်အားဖြင့် ဆေးကုသမှုမလိုပါ။ နို့ပြန်အန်ခြင်းသည် အန္တရာယ်မရှိသော်လည်း မိဘများအတွက် စိတ်ပူပန်မှုကို ဖြစ်စေနိုင်သည်။ ထို့ကြောင့် ကျန်းမာရေးအသိပညာပေးခြင်း၊ ကာကွယ်ရန် နည်းလမ်းများ သင်ကြားပေးခြင်းစသည့် လမ်းညွှန်မှုများ ပြုလုပ်ပေးခြင်းဖြင့် ရောဂါလက္ခဏာများကို လျော့နည်းစေနိုင်သည့်အပြင် မိဘများ၏ စိုးရိမ်ပူပန်မှုကို လျှော့ချပေးနိုင်သည်။

အောက်ပါနည်းလမ်းများသည် နို့အန်ခြင်းကို အပြည့်အဝ မတားဆီးနိုင်သော်လည်း အကျိုးရှိသော နည်းလမ်းများဖြစ်သည်။

မိခင်နို့တစ်မျိုးတည်းတိုက်သော ကလေးများကို နို့တိုက်ပုံ၊ ပွေ့ချီပုံ အနေအထားနှင့် နို့သီးခေါင်း ထိကပ်နို့စို့မှု အနေအထား မှန်ကန်စွာ တိုက်စေပါက နို့စို့ချိန်အတွင်း လေမျိုချသောပမာဏ နည်းသွားသည့်အတွက် အန်ခြင်း၊ လေထိုးခြင်းတို့ကို သက်သာစေနိုင်သည်။ (Breastfeeding)
ဖော်မြူလာနို့မှုန့်တိုက်သော ကလေးများအတွက်လည်း နို့ဗူးစို့ချိန်တွင် ဗူးကို အနည်းငယ်ထောင်ပြီး တိုက်ပေးခြင်း၊ နို့ဗူးခေါင်း၏ အပေါက်သည် ကလေး၏ ပါးစပ်ပေါက်နှင့် အနေတော် အရွယ်အစားကိုသာ ရွေးချယ်သုံးပေးခြင်းတို့သည် နို့စို့ချိန်အတွင်း လေမျိုချမှု လျှော့ချပေးနိုင်သည်။ ထို့ပြင် တစ်ကြိမ်ဖျော်တိုက်သော နို့မှုန့်ပမာဏကို အနည်းငယ် လျှော့တိုက်ခြင်းဖြင့်လည်း အကျိုးရှိစေနိုင်သည်။ ကလေးဗိုက်မဝဟု ထင်လျှင် ပမာဏအနည်းငယ်စီကို အကြိမ်‌ရေတိုး၍ တိုက်ပေးနိုင်သည်။
မိခင်နို့ဖြစ်စေ၊ နို့မှုန့်ဖြစ်စေ နို့တိုက်ပြီးပြီးချင်း ကလေးကို (၁၅) မိနစ်မှ နာရီဝက်ခန့် ခေါင်းနှင့် ကျောကုန်းကို တည့်မတ်စွာထောင်၍ ချီထားပေးပြီး လေထုတ်ပေးသင့်သည်။
နို့စို့ ပြီးပြီးချင်း ကလေးကို သေးခံ(diaper) လဲပေးခြင်းကို ရှောင်သင့်သည်။
အထက်ပါ နည်းလမ်းများနှင့် မသက်သာပါက အစာအိမ် အချဥ်ဓာတ် လျှော့ချပေးသော ဆေးဝါးများနှင့် အအန်သက်သာစေသော ဆေးဝါးများကို ဆရာဝန်၏ ညွှန်ကြားချက်ဖြင့် တိုက်ပေးနိုင်သည်။ အချို့ဆေးဝါးများသည် ဘေးထွက်ဆိုးကျိုး အနည်းငယ်ရှိတတ်သောကြောင့် မိမိသဘောဖြင့် ကာလရှည်ကြာစွာ မတိုက်မိစေရန် အရေးကြီးသည်။

ကာကွယ်ခြင်း

နို့စို့အရွယ်ကလေးများ နို့ပြန်အန်ခြင်းကို လုံးဝမဖြစ်အောင် ကြိုတင်ကာကွယ်၍ မဖြစ်နိုင်ပေ။ သို့ရာတွင် အထက်ပါ ကုသမှုနည်းလမ်းများကို မှန်မှန်ပြုလုပ်ပေးခြင်းဖြင့် လက္ခဏာများ သက်သာစေရုံသာမက ကာကွယ်စေသည့် အာနိသင်ပါ ရရှိစေနိုင်သည်။ အရေးကြီးဆုံးမှာ ပုံမှန်မဟုတ်သော ရောဂါလက္ခဏာများ ပေါ်ပေါက်လာပါက အခြေအနေပေါ်မူတည်ပြီး မိသားစုဆရာဝန်နှင့် ပြသရန် သို့မဟုတ် ပြင်းထန်သည့် အခြေအနေဖြစ်ပါက ဆေးရုံ အရေးပေါ်ဌာနများသို့ အချိန်မီပြသ ကုသမှုခံယူခြင်းပင်ဖြစ်သည်။

References:

Website, N. (2022). Reflux in babies. nhs.uk. Retrieved July 3, 2024, from https://www.nhs.uk/conditions/reflux-in-babies/
Kids Health Info : Reflux (GOR) and GORD. (n.d.). Retrieved July 3, 2024, from https://www.rch.org.au/kidsinfo/fact_sheets/Reflux_GOR_and_GORD/#:~:text=Reflux%20is%20very%20common%20in%20babies%2C%20and%20will%20usually%20get,)%2C%20which%20may%20need%20treatment.
Children’s Health Queensland. (2023). Reflux. Retrieved July 3, 2024, from https://www.childrens.health.qld.gov.au/health-a-to-z/reflux
Nct. (2024). What is baby reflux? Symptoms and support | Baby & toddler, Feeding articles & support | NCT. NCT (National Childbirth Trust). Retrieved July 3, 2024, from https://www.nct.org.uk/baby-toddler/feeding/common-concerns/what-baby-reflux-symptoms-and-support#:~:text=Baby%20reflux%20signs%20and%20symptoms&text=Symptoms%20of%20a%20baby%20having,needing%20to%20burp%20after%20feeds.